طالبان : د ارګون بازار کې چاودنه ددوې کار نه بلکې ددښمن یوه دسیسه ده

لیکوال : محمد أفغاني

د افغانستان پکتیکا ولایت د ارګون ولسوالۍ بازار کې په یوې چاودنې کې لږترلږه ۸۹ کسان وژل شول او لسګونه نور ټپیان شول .

چاودنه نن ګهیځ شاوخوا لس بجې  وشوه ، او دومره زوروره وه، چې د مارکیټ چت یې راوغورځاوه او ډېر خلک ترې لاندې شول.

طالبانو په خپله رسمي اعلامیه کې دا کار غندلی او ویلي یې دي چې دا کار ددوې نه دی بلکې د دښمن د هغه دسیسو څخه یوه دسیسه ده چې مجاهدینو د بدنامولو په موخه یې په کار اچوي .

طالبانو وویل : څرنګه چې دښمن د مختلفو دسیسو په کار اچولو سره دمجاهدينو دبدنامولو هڅې کوي، امکان لري چې د پکتيکا د ارګون د نن ورځې پيښه هم مجاهدينو ته منسوب کړي.

بناء موږ هېوادوالو او رسنيو ته په ډاګه کوو چې دغه کار د اسلامي امارت د مجاهدينو نه ده اونه هم مسئولين د دغه راز عمل د ترسره کولو اجازه ورکوي، په دې اړه بايد ټول ډاډه ووسي.