مصر: د اعدامونو حکم پرضد د محصلينو لاريون، په تاو تريخوالي واوښت

لیکوال : احمد بشير.

..

نن د مصري پوهنتونونو محصلينو  د يو لاريون په ترڅ کې د دغه هیواد د محکمې له خوا  د اخوان المسلمين د مشر دکتور محمد بديع په شمول، په 683 کسانو د پرونۍ فيصلې غندنه وکړه.

لاريون کوونکو له ځانو سره ليکل شوي پیغامونه لېږدول چې د اعدامونو پرضد غبرګون څرګندونه یې کوله.

د ازهر په پوهنتون کې د “حركة طلاب ضد الانقلاب” په نوم د کودتا ضد  محصلينو يوې ډلې ويندوی محمود الازهري رسنيو ته ويلی دي: وروسته له هغې چې د مصري محکمې لخوا د اعدامونو د حکم پر ضد قهرجن مظاهرچيان ښه په زور پرمخ لاړل، امنيتي ځواکونو د قاهرې په ختيځ کې د نصر په ښار کې د ازهر پوهنتون د هلکانو څانګه خالې کړه.

نوموړي دا هم وویل چې د لاريون کوونکو مصري محصلينو او  امنيتي ځواکونو ترمنځ د تاو تريخوالي رامنځته کېدلو په ترڅ کې په لس ګونو محصلين ټپيان شوي دي.

پوليسو د لاريون د پاشلو په موخه اوښکي بهوونکي ګازي مرمۍ هم وکارولي.

محمود الازهري څرګنده کړه چې د پوليسو اړوند زره پوش لېږدوونکو وسایلو د محصلينو استوګنځای محاصره کړ، ترڅو هغه لاريون کوونکي محصلين تر بريد لاندې راولي، چې په امنيتي ځواکونو باندې يې تيږي ورولې، او د ګاز د لوخړو د مخنيوي لپاره يې د ونو لختو ته اورونه ورکړي وه.

همدارنګه د مصر په جنوب کې د اسيوط په پوهنتون کې هم د یو عسکر او ۹ محصلينو په شمول ټول ټال لس کسان ټپيان شوي دي.

احمد بشير.