مصر: د اخوان المسلمين د مشر په ګډون ۶۸۳ کسان په اعدام محکوم شول

لیکوال : محبت خان

..

مصر کې د اخوان المسلمين د مشر دکتور محمد بديع په شمول، 683 کسان په اعدام محکوم شول.

په دغو کسانو باندې د مصر په سوېل کې د کب په میاشت کې د پوليسو پر يوې اډې د بريد تور لګول شوی دی.

د محکمې د پرېکړې سره سم، په اعدام باندې د ځينو محکوم شوو بنديانو خپلوان په ژړا شول آن تردې چې د ځينو يې ښځينه خپلوانې بې سده هم شوې.

د يادونې وړ ده، چې له کومې ورځې راهيسې په مصر کې د حافظ محمد مرسي منتخب حکومت د سيکولر عبد الفتاح السيسي په مشرۍ د کودتا په ترڅ کې راوپرځول شو، ورسره سم په اخوان المسلمين ګوند باندې بنديزونه ولګول شول، او په سلګونو مصري اسلامپاله وګړي په بې رحمانه ډول يا ووژل شول او یا د زندان تورو تيارو ته واچول شول او دا وحشيانه لړۍ لا دوام لري، خو د بشري حقوقو مدعيانو يې تراوسه په مخنيوي کې په جدي ډول څه نه دي کړي.

دا لومړی ځل نه دی چې اسلامپاله مصريان په دومره لوړه کچه په اعدام محکم کېږي، له دې مخکې د مارچ په میاشت کې هم ۵۲۹ کسان په اعدام محکوم شول، چې بيا ورڅخه د ۴۹۲ کسانو حکم لغو شو، او ډېر یې په عمري بند محکم شول.

محبت خان

.