څلوریزې / انتخابات یا اکثریت ګرایي

لیکوال : قاري سعيد

دیموکراسي که ، یوه ناروغي ده
نوښه بیا داده ، چې انساني ده
که حیواني شي ، نوپاچاهي مو
یا دمنګس ده ، یا دمیږي ده

په کُل جهان کې ، که الیکشن شي
چې مشر مرد شي ، او که دې زن شي
په لومړي وار به ، یې ښځې یوسي
او بریالۍ به په څلور رَن شي

که په ځنګله کې ، انتخابات وای
شاه به شغال وای ، زمری به مات وای
ټول ګیدړان به ، یې وزیران وای
پرتم به نه وای ، غدر به زیات وای

که شان دبوټو ، په اکثریت وای
ګلاب به خدایزده ، په کوم حالت وای
پاچا به ځوځ وای ، او یا سوندریږی
ریحان به ورک او ، هېر اقلیت وای

که په دریاب کې ، لحاظ دشمېر وای
زیرک دولفین به ، دټولو هېر وای
په شمشتیو، او مارماهیانو
به مو نظر او ، پام راچاپېر وای

نرخ دموادو ، که په کمیت وای
نه به طلا وای ، نه بې شهرت وای
له خاورو ډکې ، به خزانې وای
ګېڼې د خټو ، به مو زینت وای

دیموکراسیه ! بنیاد دې خام دی
په تا کې کیف چې ، د کم غلام دی
عقل دې ناخلي ، درنه بېزار شو
که څوک مني دې ، ورته سلام دی
قاري سعيد