مصر کې د اخوان المسلمين ۵۲۹ غړي په اعدام محکوم شوي

لیکوال: جمال الدين

د مصر المنیا جنايي جرمونو محکمې د اخوان المسلمین ګوند د ۵۲۹ غړو دوسیې مفتي ته حواله کړې دي.

مفتي ته د تورنو د دوسیو استول په مصري قانون کې د اعدام په مانا دي.

پر دغو کسانو د یوه افسر د وژلو او د پولیسو د وسلو ترلاسه کولو تورونه لګېدلي.

همداشان دوی تورن شوي، چې ګني عامه او خاص ملکیتونه یې سېځلي دي.

په دغو تورنو کې د المنیا ځینې سیمه ییز مخکني چارواکي او د ولسي جرګې او د اخوان المسلمین ګوند ځینې غړي هم دي.

د نیول شویو له ډلې پر ځینو تورنو تور دی، چې پر کلیساوو او موزیم یې بریدونه کړي او زیاتره لرغوني اثار یې لوټ کړي دي.

د هغو تورنو خپلوانو اعتراض کړی، چې خپلوان یې په اعدام محکوم شوي.

د محکمې پلاوي ته به ۱۷۰ تورن حاضر شي، خو نور تورن تري تم شوي دي.

تورنو ته د استیناف حق ورکړل شوی دی.

دغه کسان د پخواني منتخب ولسمشر حافظ محمد مرسي د هغو ۱۲۰۰ کسانو له ډلې دي  چې مصر کې یې محاکمه دوام لري.

په تېر جولای میاشت کې د حافظ دکتور محمد مرسي تر لیرې کېدا وروسته، مصري چارواکو له اخوان المسلمین ګوند او ملاتړو سره خپل چلند سخت کړ.

د دغې اسلامپالې ډلې زرګونه کسان ونیول شول او سلګونه نور پولیسو په شهادت رسولي دي.

جمال الدين