ليکوال: خالد اسلام جار

د طالبانو ویاند ذبيح الله مجاهد د دويم پړاو ټاکنو په مرکزونو او اړوندو کسانو باندې د بريدونو خبر ورکړی دی. نوموړي په یوه خبر پاڼه کې چې مونږ ته يې هم رالېږلې ده، ويلي دي چې د جعلي انتخاباتو په پروسه د اسلامي امارت د مجاهدينو لخوا د خيبر عملیاتو په لړ کې نن ورځ د غرمې ۱۲ بجو پورې د هيواد په ټولو ولاياتو کې د ۲۴۶ بریدونو راپورونه ترموږ پورې  رارسيدلي دي.

د نوموړي په وينا د طالبانو د سختو بريدونو له امله زیاتره انتخاباتي مرکزونه تړل شوي دي.

ښاغلي مجاهد په خپله خبرپاڼه کې زياتوي: له سهار ۷ بجو څخه په ټول هيواد کې په خورا همانګۍ سره د انتخاباتو په مراکزو، ساتونکو او اړوندو کسانو بریدونه روان دي. خو غرب پلوه رسنيو د اسلامي امارت د مجاهدينو د بریدونو يو راپور هم نه ده خپور کړی.

د يادونې وړ ده چې پرون د دفاع وزارت ځينو چارواکو هم منلې وه، چې په تيرو ټاکنو کې د طالبانو لخوا په دوي ۶۹۰ عمومي او له ۴۰۰ زیات خاص بريدونه ترسره شوي وو.

خالد اسلام جار.