سرپل: د یو ښونځي د چت لویدو له امله ٣١ زده کوونکي ټپیان دي

ليکوال: خالد اسلام جار

نن سهار د افغانستان د سرپل ولایت د مرکز په يوه ښوونځي کې د يوه ټولګي چت لوېدلى، چې د يوه ښوونکي په ګډون ۳۱ ټپيان تر روغتونه رسول شوي دي.

ياد ښوونځى چې د کورک ازبکي په نوم ياديږي، د سرپل ښار په شمالي څنډه کې پروت دى.  د سرپل د ملکي روغتون د جراحۍ څانګې مسوول ډاکټر نعمت الله يلداش رسنيو ته ويلي چې په ښوونځي کې ٥٠ زده کوونکي وه چې د چت پرېوتو له امله يې ٣١ زده کوونکي ټپيان شوي دي.

هغه زياته کړه، چې د ټپي زده کوونکو عمرونه د ٦ او ٨ کلونو ترمنځ دي، د څلورو روغتيايي حالت د اندېښنې وړ او د پاتې نورو ډاډمن دى. د سرچينې په وينا، ټپيان ټول د لومړي ټولګي زده کوونکي دي، او تر اوسه د ټولکي د چت لوېدو لامل نه دى څرګند.

د کورک  کلي یو اوسېدونکى پاينده محمد چې په ياده پېښه کې يې پنځه اولادونه ټپيان شوي دي، د پوهنې پر رياست د سختې نيوکې په ترڅ کې يې زیاته کړه، چې تېر کال هم د دغه ښوونځي يوه خونه لوېدلې وه، خو بيا هم مسوولينو دې ودانۍ ته سمه پاملرنه ونه کړه.

نوموړي زیاته کړه چې دوی د خپلو جېبونو په غم کې دي، د خلکو د اولادونو هيڅ په کيسه کې نه دي.

خالد اسلام جار.