بګرام: طالبانو په يو توغنديي بريد کې ۲ الوتکې او ۳ د تېلو زخيرې له منځه وړي

لیکوال :خالد اسلام جار.

..

طالبانو د خيبر په نوم د پسرلنيو عملياتو په لومړي سهار د پروان ولايت د بګرام په هوايي اډه د ميزايلو په يوه بريد کې مېشتو ځواکونو ته  درانه  مالي زيانونه اړولي دي.

د طالبانو وياند ښاغلي ذبيح الله مجاهد رسنيو ته په استول شوي خبر پاڼه کې ويلي چې ياده هوايي اډه بيګا شپه پرله پسې،  ۲ بجې، ۳ بجې او بيا سهار وختي ۴ او ۵بجې په توغنديو وويشتل شوه.

نوموړي زياته کړې چې په يادو بريدونو کې دوه الوتکې، درې  د تيلو زخيرې او ګڼ نقليه وسائط له منځه تللي دي.

له سيمې څخه عينې شاهدان وايي له بريدونو وروسته تر ډېره وخته د هوايي اډې په ځينو برخو کې درې  ځایه اور بلېده چې لمبې يې له ډېر لري سيمو تر سترګو کېدلې

د يادونې وړ ده چې طالبانو څو ورځې وړاندې (پنجشنبه ۱۳۹۳/۲/۱۸هـ ش) ، د نوي کال لپاره په یوه اعلاميه کې د خیبر په نوم د جهادي عملیاتو اعلان وکړ، په دغه اعلامیه داسې هم راغلي وه، چې «د خیبر په نوم دغه پسرلني عملیات به د ټول هیواد په سطحه دراتلونکې دوشنبې په ورځ د روان ۱۴۳۵هجري قمري کال د رجب المرجب د میاشتې په ۱۳ نیټه … د سهار په ۵ بجو د الله اکبر په ویلو سره پیل کیږي».

داسې ښکاري لکه طالبانو چې د پراخه، کلکو او پريکنده بریدونو تابیا کړې وي، لکه څنګه یې چې په اعلامیه کې ویلي، هماغسې يې همدا نن ورځ (دوشنبه) د اعلان شوو  پسرليو عملياتو د تطبیق لومړنۍ ورځ وګرځوله، چې د بګرام ، جلال اباد، غزني او نورو بريدونو باندې پیل شوه.

ځينې افغان شنونکي په دې اند دي چې د تل په څېر د هوا له تودیدو سره د طالبانو بریدونه هم پراخېږي او هم توندېږي، که انتخابات دوهم پړاو ته لاړ شي لکه وړاند وینې چې کېږي، کېدای شي له امنیتي پلوه ستونزې زیاتې شي!.

خالد اسلام جار.